3. Preis beim Mundartwettbewerb 2008

Dr Pirat uff am Gmiesbeet

Dr Fritz liggt faul en dr Sonn. Er hot heit frei. S’isch nämlich Fasnet. Dr Fritz isch Herausfinder. Er isch berihmt, hot scho viele Fäll glöst. Heit dut’r mol nex. Uff oimol rieft äbbr: „Hallole, hallole!“ Dr Fritz macht Auga uff ond gähnt. Am Zau schtoht sei Kumpl Peter. “Was isch los?”, frogt dr Fritz. „I brauch Hilf“, said dr Peter. O je, o je, sei freier Dag! Abr er said: „Komm rei!“ Dia zwoi setzet sich uff d’Terrass ond dr Peter vrzehlt.

„I hann henterm Häusle a Gmiesbeet, mit de beschte Gelberiaba von dr Welt. I hann se uff am Markt vrkaufa wella.“ Dr Fritz frogt: „Ond? Hot se oinr ausgraba?“ Dr Peter nickt: „Jo, an Pirat. Ond i hann em au noh gholfa.“ Dr Fritz isch baff. „Was denn fir an Pirat?“, will’r wissa. Abr des woiß dr Peter au net so recht.

Dr Pirat hot vorher bei em klinglt. Er hot gsaid: „En deim Gmiesbeet isch an Schatz vrschteckt. Den missa mr ausgraba.“ Dr Fritz schittlt da Meckl. „Ond des hosch du glaubt?“ Dr Peter nickt wiedr. Er hot halt denkt, Pirata wisset ällas ibr Schätz. „I nemm o“, said dr Fritz, „ihr hend koin Schatz gfonda.“ „Noi, bloß Gelberiaba“, moint dr Peter. „Mir hend se älle uff an Haufa glegt. Ond jetzt send se weg.“

Dr Dedektiv Fritz grinst vrschtohla. „Wer dia wohl gholt hot!“ Dr Peter hot koi Ahnong. „Na, dr Pirat nadierlich!“, moint dr Fritz. Dr Peter rieft: „So an Schurk!“ Zom Glick kon’r den Schurka beschreiba. „Er hot an Holzfuaß. Ond a Augaklapp. Ond a rots Duach om da Grend.“

Dr Fritz denkt noch. Drbei kaut’r Bubble Gum. Des hilft beim Iebrlega. Plötzlich schtrahlt’r. „I iebrnemm da Fall. Du wirsch von mir hera.“ Dr Peter goht dann mol.

Dr Fritz goht uff da Märkt. Er kauft a Schtick Käs, a paar Oier ond an Fisch, a Forell. Aus Gmies macht’r sich net so viel draus. Trotzdem guckt’r sich’s o, genau wia dia Leit, dia’s kaufet. Dr Baur vom Waldhof hot schene Gelberiaba, der vom Lerchahof au. Ond dr Biobaur Willi erscht recht! Dr Fritz goht von oim zom andra. Beim Biobaur Willi bleibt’r schtanda.

Er will Gelberiaba kaufa. Ond zwor zwoihondert Kilo! Dr Willi said:“ So viel hann i net do. Komm hoim zo mir, do kriagscht so viel wia de willscht.“ Dr Fritz frogt: „Wo wohnsch denn?“Dr Biobaur moint: „En dr Waldschtroß 17.“ „Na, dann bis heit nochmittag“, said dr Fritz ond goht.

Do hot’r abr gloga. Er goht nämlich glei zur Waldschtroß 17. Ond tatsächlich! Henta em Garta liegt an riesa Berg Gelberiaba! Dr Fritz schtoht lang davor. Dann goht’r om’s Haus. Abr älle Diara send vrschlossa. Vor dr Kellerdiar sieht’r a paar Schuah. Er bickt sich ond beguatachtet dia. Drnoch nickt’r zfrieda ond pfeift durch d’Zäh. Jetzt abr ruckzuck zom Peter!

„Guate Nochrichta!“, rieft dr Dedektiv. „I hann da Pirat!“ Meh said’r abr net. „Heit nochmittag werd i dir’s beweisa.“ Nochmittags fahret dr Fritz ond dr Peter mit ama Laschtwaga zu dr Waldschtroß 17. Dr Willi effnet Diar. Er guckt da Peter schräg o.

„Der jonge Mo isch mei Helfer“, erklärt dr Fritz. „Am beschta ladet mr glei dia Gelberiaba uff da Laschtwaga.“ Zu dritt machet se sich an d’Arbet. Se schleppet zehn Kerb voll Gelberiaba. Hentrher will dr Biobaur sei Geld.

„Moment mol“, said dr Fritz. „Kann i mir mol rasch meine Händ wäscha?“ Dr Willi zoigt em s’Badezemmr. Noch ama Weile kommt dr Fritz mit blitzende Auga zrick. „Ond jetzetle des Geld“, said dr Willi. „Von ons kriagsch kois“, erwidert dr Fritz. „Wenn du Geld brauchsch, muasch drnoch graba. A Pirat wia du ko des doch beschtemmt!“ Dr Willi behauptet: „I ben koi Seeraiber!“ „Ond ob!“, rieft dr Fritz. „Wenn au koi echtr.“ Dr Willi knurrt: „Des muasch mr erscht beweisa!“

Dr Fritz holt äbbas aus seinr Hosadasch. „Beweis Nommr oins“, erklärt’r, „isch dia Augaklapp. I hann se em Bad gfonda!“ Dr Willi wird ganz weiß em Gsicht. „Beweis Nommr zwoi isch dei Halsduach. Des hot dr Pirat als Kopfduach draga.” Dr Willi schluckt. „Beweis Nommr drei“, zitiert dr Fritz, „send deine Schuah vor dr Kellerdiar. Oinr isch dreckig, dr andre net.“ Dr Willi schtehnt.

„Na klar!“, rieft dr Peter. „Dr Pirat hot jo bloß oin Schuah ghet! Fir sein Holzfuaß braucht’r jo koin.“ Dr Fritz beschtätigt des ällas kopfnickend. „Deswega isch bloß dr oine Schuah dreckig worda ond dr andre isch saubr blieba.“ Jetzetle gibt dr Biobaur Willi ällas zua. Er hot denkt, weil Fasnet isch, kommt mr ihm net so schnell uff d’Schlich. S’isch ihm jetzt arg peinlich ond er schämt sich au. Muaß’r vielleicht en da Knascht?

Dr Fritz moint zu ihm: „Hol dein Holzfuaß ond vrbrenn en vor onsre Auga!“ Dr Willi ghorcht zerknirscht. Ond wia dr Holzfuaß zu Äsche vrbrennt isch, machet sich dr Fritz ond dr Peter uff d’Socka. Zfrieda fahret se mit de Gelberiaba hoim.

Simon Ziegler, Klasse 6b der Friedrich-Steinbeis-Realschule, Vaihingen an der Enz.