Gedichte

Lied vom Penner

Brombacher, Margret
uf ere chleine Bank im Park
sitzt en alde Ma
zwüsche sine Schlurbe
stoht e Fläsche Schnaps
Lumpe um ihn umme
under sich Papiir
Einsamkeit isch in ihm drin
niemers luegt dört hi

sprochlos isch hüt d Stilli
wo si Mantel isch
tonlos sini Wörter
wo niemers höre will
luftleer um ihn umme
er zellt hüt niene meh
läschtig isch er Viile
de Penner wo dört sitzt

de graui Bart isch filzig
de Blick verhange trüeb
de Alkohol isch s einzig
wo ihm bliibe isch
s Läbe hät en beutlet
us sine Gleiser keit
un hüte isch er einsam
heimatlos ellei
uf ere chleine Bank im Park
sitzt en alde Ma
zwüsche sine Schlurbe
de letschti Fründ parat
brueche cha mer niemers
wo us der Reihe tanzt
un drum isch er einsam
heimatlos ellei.

November 2000